«ឈាមពេជ្រ» ចេញលក់ថ្ងៃនេះ! ខែ កក្កដា 4, 2009
Posted by រចនា in ដំណឹងផ្សេងៗ.16 comments
ចម្រៀងថ្មី «ឈាមពេជ្រ» ដែលទើបតែចេញលក់ក្នុងពេលថ្មីៗនេះបានទទួលការគាំទ្រយ៉ាងខ្លាំងពីសំណាក់មិត្តអ្នកស្ដាប់។ ចម្រៀងនេះនិពន្ធទំនុកច្រៀងដោយ លោក សុខ ចាន់ផល សម្រួលតន្ត្រីដោយលោក ម៉ម សុគន្ធា ច្រៀងដោយអ្នកចម្រៀងល្បីល្បាញប្រចាំចិត្ត (ខ្ញុំ 
) គឺលោក ឆន សុវណ្ណរាជ។ បទនេះមានក្នុងស៊ីឌីរស្មីហង្សមាស វ៉ុល ៣៨៦។
«ឈាមពេជ្រ» រំលេចពីខ្សែជីវិតតស៊ូនៃស្ត្រីមេម៉ាយម្នាក់ដើម្បីឱ្យកូនបានសិក្សារៀនសូត្រ។ ពេលស្ដាប់បទនេះ គ្រប់គ្នាប្រហែលជានឹកទៅដល់អ្នកម្ដាយរបស់យើងរាល់គ្នា… ម្ដាយដែលធ្វើគ្រប់យ៉ាងដើម្បីកូន បំពេញបំណងកូន… «ឈាមពេជ្រ» ក៏បង្ហាញឱ្យឃើញផងដែរនូវទឹកចិត្តកត្តញ្ញូរបស់កូនប្រុសម្នាក់ចំពោះអ្នកម្ដាយជាទីស្រឡាញ់របស់គេ។ “ ទោះនៅឆ្ងាយពីគ្នា ក៏កូននៅតែនឹកម៉ែ ស្រឡាញ់ម៉ែ អាណិតម៉ែ។ កូននឹងខំប្រឹងដើម្បីតបស្នងនូវការលះបង់របស់ម៉ែ! កូននឹងតស៊ូយកបរិញ្ញាជូនម៉ែឱ្យបាន!”
បទនេះសម្រាប់ខ្ញុំគឺមិនដូចជាបទទូទៅទេ! បទចម្រៀងរៀបរាប់ពីជីវិតនៃការរស់នៅបែកពីអ្នកម្ដាយជាទីស្រឡាញ់របស់គេតែងតែធ្វើឱ្យខ្ញុំនឹកដល់ម៉ាក់យាយរបស់ខ្ញុំជានិច្ច។ មិនដឹងថាគ្រប់គ្នាស្ដាប់ហើយនឹងយំចេញមកដូចខ្ញុំឬអត់ណ៎??? សាកស្ដាប់មើល៍ យ៉ាងណាដែរ? នេះស្ដាប់មិនបានចប់ទេព្រោះវាគ្រាន់តែជាពាណិជ្ជកម្មប៉ុណ្ណោះ!
ខ្ញុំមិនសូវបានសរសើរអ្នកនិពន្ធបទចម្រៀងមួយបទនេះទេព្រោះអ្នកនិពន្ធនេះក៏ពូកែអួតសម្បើម! lolz គ្មានអ្នកណាលើក ក៏លើកខ្លួនឯងទៅជារឿយៗ! J/K ដោយសារតែអ្នកនិពន្ធប៉ិនជោរ ដូច្នេះហើយខ្ញុំមិនសូវហ៊ានសរសើរចំមុខទេ! សរសើរនៅទីនេះក៏បាន! ចង់ប្រាប់ថា “ បងចាន់ផលពូកែណាស់! បទចម្រៀងមានន័យល្អ ហើយចាប់ចុងចួនត្រឹមត្រូវ! សូមឱ្យជោគជ័យ ហើយក៏ជូនពរឱ្យល្បីណា៎!”
ព្រមចុះចាញ់មេឃដី ខែ មិថុនា 10, 2009
Posted by អាចម៍ផ្កាយ in រឿងខ្លី.1 comment so far
ស្នេហាគឺជាការលះបង់។ ស្រឡាញ់មនុស្សម្នាក់ មិនចាំបាច់បានរស់នៅក្បែរគេនោះទេ បានត្រឹមឃើញគេរស់នៅប្រកបដោយសេចក្តីសុខ ក៏គ្រប់គ្រាន់ណាស់ទៅហើយ។
«បងនភា! ម៉េចក៏បាត់ដំណឹងបងសូន្យឈឹងយ៉ាងនេះ? បងមកដល់ស្រុកខ្មែរយូរហើយ មែនទេ? ចុះម៉េចក៏បងមិនមករកខ្ញុំ? បងព្យាយាមគេចពីខ្ញុំមែនទេ? បងអស់ចិត្តនឹងអូនហើយមែនទេ?»
នភាសម្លឹងមុខសង្សារបន្តិចក៏ងាកមុខចេញ ហើយតំណក់ទឹកភ្នែកថ្លាៗក៏ហូរមកដក់ជោគពេញប្រឡង់ភ្នែក។ នរៈចង់និយាយណាស់ថា បងស្រឡាញ់អូន! បងនឹកអូន! តែគេធ្វើមិនបាន។ កំលោះក៏គេចមុខដើរចេញ តែត្រូវអាក់ដំណើរដោយសារតែសម្តីរបស់លំអងភ្លៀង៖
«ព្រោះប៉ារបស់អូនមែនទេ? ប្រាប់អូនមកមើល! គាត់ថាម៉េចឲ្យបងខ្លះ?»
នភាខាំបបូរមាត់ស្ទើរដាច់ ងាកមុខផាំងមកនិយាយនឹងតូចតន់៖
«មិនទាក់ទងនឹងគាត់ទេ! តែព្រោះស្នេហា វាស៊ីមិនកើតអូនដឹងទេ? លុយទៅវិញតើ ដែលសំខាន់បំផុតនោះ!»
លំអងភ្លៀងស្រក់ទឹកភ្នែកនឹងសម្តីសង្សារ… នាងបោះជំហានថយក្រោយយឺតៗ រកកល់នឹងដួល៖
«អូ… ព្រោះយ៉ាងនេះតើ! …អូនគួរណាស់តែជឿសម្តីប៉ាតាំងពីដំបូងម្ល៉េះ! ព្រោះស្រឡាញ់បងអូនខំជំទាស់នឹងប៉ា ប្រឆាំងនឹងប៉ា មិនគួរណាបងធ្វើបែបនេះចំពោះអូនសោះ!!!»
«ហ៊ឹស! នេះមកពីអូនល្ងង់! អូនល្ងង់ណាស់ដែលមកស្រឡាញ់បង! ប៉ារបស់អូនទើបនិយាយត្រូវ! មនុស្សសន្តានព្រៃដូចបងនេះ មិនគួរឲ្យទុកចិត្តឡើយ ដឹងទេ?!!! បានហើយ!ល្មមឲ្យរឿងរបស់យើងចប់ត្រឹមហ្នឹងចុះ…»
នភាបោះជំហានដើរគេចវឹងលែងងាកក្រោយ ទឹកភ្នែកកូនប្រុសក៏ស្រក់មកប៉ាត់ៗដូចតំណក់ឈាម។ លំអងភ្លៀងដួលព្រុសសន្លប់បាត់ស្មារតី។ មួយខែក្រោយមក… អាពាហ៍ពិពាហ៍របស់នាងនិងសមុទ្រ បុត្រាទោលរបស់ត្រកូលអភិជន ក៏ចាត់ឡើងយ៉ាងគគ្រឹកគគ្រេង។
[ ចង់តវ៉ាមេឃដីដែលឲ្យយើងជួបគ្នា
តែមិនព្រមចាប់យើងជាគូគ្នា
មេឃដីមានចេតនាចង់លេងសើចនឹងយើង... អ្នកថាបែបនេះទេ?
ហេតុអីត្រូវហាមស្រឡាញ់គ្នា
ភាពសមរម្យនោះឬដែលស្ថិតស្ថេរ ទោះបីប្រឆាំងនឹងបេះដូង
ទីបំផុតត្រូវព្រមចុះចាញ់។
មុននឹងយើងចែកផ្លូវគ្នា
មុននឹងសុបិនរបស់យើងត្រូវបញ្ចប់
គ្រាន់តែចង់ជួបអ្នកមួយគ្រា ប្រសប់ភ្នែកនឹងគ្នាម្តងទៀត
ដើម្បីឲ្យខ្ញុំបានប្រាប់អ្នកមួយពាក្យ
និយាយនៅថ្ងៃដែលត្រូវបែកគ្នា
ចង់ឲ្យអ្នកដឹងថាស្រឡាញ់ខ្លាំងណាស់... ហើយនឹងស្រឡាញ់ ស្រឡាញ់រហូតទៅ។
កើតជាតិនេះបានត្រឹមជួបគ្នា
កើតជាតិមុខចាំនាំគ្នាសុបិនជាថ្មី
ថ្ងៃនេះបេះដូងខ្ទេចខ្ទាំ ព្រមចុះចាញ់ឲ្យមេឃដីបំបែកយើងឆ្ងាយពីគ្នា
ពេញចិត្តហើយមែនទេមេឃដី ដែលបានឃើញមនុស្សព្រាត់គ្នា?
វាត្រូវតែឈឺត្រូវតែគ្រាំគ្រា... ត្រូវតែស្រក់ទឹកភ្នែក។
ភពផែនដីនេះមានមនុស្សច្រើនណាស់
ចុះហេតុអ្វីត្រូវធ្លាក់មកលើយើងទាំងពីរ
ព្រមចុះចាញ់ហើយមេឃដី សង្ឃឹមថាគង់នឹងពេញចិត្ត
មនុស្សស្រឡាញ់គ្នា មេឃដីបែរជាមិនយល់ចិត្ត។ ]
«កាបូបលុយ»ជាប់ចំណាត់ថ្នាក់លេខ៣! ខែ មិថុនា 9, 2009
Posted by អាចម៍ផ្កាយ in ដំណឹងផ្សេងៗ, រឿងខ្លី.4 comments
រាល់ថ្ងៃមិនដឹងថាគេចាត់ទុកខ្ញុំជាមិត្តភក្តិឬអត់ ព្រោះមានដំណឹងល្អៗបែបនេះគេមិនដែលនិយាយប្រាប់ខ្ញុំសោះ ទាល់តែខ្ញុំដឹងដោយខ្លួនឯង ទើបគេប្រាប់ជាក្រោយ។ បើថាទូរស័ព្ទថ្លៃ ផ្ញើសារមិនកើត ទូរស័ព្ទមិនចេញ ទាក់ទងប្រាប់ព័ត៌មានតាមអ៊ីមែលក៏បានដែរ។
រឿង«កាបូបលុយ» ដែលជាស្នាដៃនិពន្ធរបស់យុវអ្នកនិពន្ធខ្មែរ សុខ ចាន់ផល ហើយដែលខ្ញុំធ្លាប់យកមកផ្សាយនៅទីនេះម្តងរួចមកហើយនោះ នៅពេលនេះបានទទួលចំណាត់ថ្នាក់លេខ៣ ពីការចូលរួមប្រកួតប្រជែងសរសេររឿងខ្លីរបស់សមាគមអក្សរសិល្ប៍នូហាច។
ខ្ញុំបានទទួលដំណឹងនេះដោយចៃដន្យប៉ុណ្ណោះ! គឺនៅពេលខ្ញុំបានចូលទៅមើលក្នុងវ៉ិបសាយរបស់សមាគមអក្សរសិល្ប៍នូហាច ក៏ប្រទះឃើញការជូនដំណឹងនៅទីនេះ។
«ស្នេហាសុភាពបុរស» ចេញផ្សាយឆាប់ៗនេះ! ខែ មីនា 29, 2009
Posted by រចនា in ដំណឹងផ្សេងៗ.7 comments
ចេញផ្សាយពី “ ឥន្ទធនូ” ឆាប់ៗនេះ!
ពិធីបិទសន្និសីទអ្នកនិពន្ធអក្សរសិល្ស៍ប្រទេសទាំងបី កម្ពុជា-វៀតណាម-ឡាវ លើកទី២ ខែ កុម្ភៈ 24, 2009
Posted by រចនា in ដំណឹងផ្សេងៗ.9 comments
ពិធីបិទសន្និសីទអ្នកនិពន្ធអក្សរសិល្ស៍ប្រទេសទាំងបី កម្ពុជា-វៀតណាម-ឡាវ លើកទី២ ប្រារព្ធធ្វើឡើងនៅសណ្ឋាគារ ភ្នំពេញ កាលពីល្ងាចថ្ងៃទី ២៣ ខែកុម្ភៈ ឆ្នាំ២០០៩ កន្លងទៅនេះ ក្រោមអធិបតីភាព ឯកឧត្តម បណ្ឌិត ថោង ខុន រដ្ឋមន្ត្រីក្រសួងទេសចរណ៍ តំណាងដ៏ខ្ពង់ខ្ពស់ ឯកឧត្តម បណ្ឌិត សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី។ ពិធីនេះក៏មានការចូលរួមផងដែរពី សមាជិកសមាគមអ្នកនិពន្ធខ្មែរ សមាជិកសមាគមអ្នកនិពន្ធវៀតណាម សមាជិកសមាគមអ្នកនិពន្ធឡាវ និងភ្ញៀវកិត្តិយសជាច្រើនរូបទៀត។
ជ័យលាភីសម្រាប់ពានរង្វាន់ទន្លេមេគង្គលើកទីពីរនេះបានទៅលើ អ្នកនិពន្ធខ្មែរ ៥រូប, អ្នកនិពន្ធវៀតណាម ៤រូប និងអ្នកនិពន្ធឡាវ ៣រូប។ សម្រាប់អ្នកនិពន្ធខ្មែរដែលបានជាប់ពានរង្វាន់លើកនេះរួមមាន៖
ផ្នែកកំណាព្យ
១. ស៊ីម ពណ្ណរាយ
២. ព ចាន់ពី
៣. ពៅ ពិសិដ្ឋ
ផ្នែករឿងខ្លី
១. ឈុន ចំរើន
២. កៅ សីហា
ចំណុចដែលគួរឱ្យកត់សម្គាល់ដែរនោះគឺថា អ្នកនិពន្ធបរទេសជាជ័យលាភីទាំង ៧រូបសុទ្ធតែមានវ័យចំណាស់ៗ ខុសពីអ្នកនិពន្ធខ្មែរដែលមានវ័យក្មេងៗ ហើយភាគច្រើនមានអាយុមិនលើសពី ៣០ឆ្នាំផងទេ៕
អង្គពិធី
រចនា និង បងសារុន
ហេ៎! ញញឹមមួយមើល៍! 
រចនា និង អ្នកនិពន្ធឡាវ
អ្នកគ្រូ ប៉ាល់ វណ្ណារីរក្ស និងបងនិមល
លោក អ៊ែល ប៊ុណ្ណា និងបងស៊ុនហួរ
បក្សីស សត្វល្អិត កុលាប 
និស្សិតអក្សរសាស្ត្រខ្មែរថតរូបអនុស្សាវរីយ៍ជាមួយឯកឧត្តម ជ័យ ចាប
ថតរូបជាមួយឯកឧត្តម ជ័យ ចាប
បងដេននី បងនិមល រចនា និង បងស៊ុនហួរ
_________________
សំបុត្រសម្រាប់មិត្តអ្នកនិពន្ធ ខែ មករា 23, 2009
Posted by រចនា in ដំណឹងផ្សេងៗ.10 comments
សំបុត្របញ្ជាក់ពីទឹកចិត្តខ្ញុំចំពោះមិត្តអ្នកនិពន្ធ
តើមិត្តដឹងទេថានៅពេលខ្ញុំអានសៀវភៅ “កំណត់ហេតុស្នេហ៍” អំពី “Message លាក់ស្នេហ៍” ដែលនិពន្ធដោយមិត្តរួមថ្នាក់ដ៏ពិសេសរបស់ខ្ញុំ ធ្វើឱ្យខ្ញុំចាប់អារម្មណ៍ជាខ្លាំង ជាពិសេសនៅត្រង់ចំណុចថា “បើអូនជាផ្កាយ បងក៏សូមក្លាយជាមេឃហើយនឹងការពារផ្កាយមួយដួងនេះរហូតទៅ” ខ្ញុំពិតជាពេញចិត្តចំពោះប្រយោគនេះខ្លាំងណាស់។
ហើយជាពិសេសជាងនេះទៅទៀត គឺត្រង់ចំណុចដែលមិត្តនិយាយនៅខាងក្រោយសៀវភៅថា “រាល់ពេលដែលខ្ញុំមិនសប្បាយចិត្ត ខ្ញុំតែងតែចង់បានស្លាបមួយគូ។ បើខ្ញុំមានស្លាប ខ្ញុំនឹងអាចហោះហើរតាមចិត្តប៉ងដោយមិនចាំបាច់ទទួលទុក្ខធ្ងន់ៗនៅចំពោះមុខ។ បើខ្ញុំមានស្លាប ខ្ញុំនឹងអាចហោះទៅស្វែងរកពិភពមួយដែលពោរពេញទៅដោយសេចក្ដីស្រឡាញ់ និងការអត់ឱន។” តើមិត្តដឹងទេ ចិត្តរបស់មិត្តគឺដូចជាចិត្តរបស់ខ្ញុំបេះបិទ ហើយអ្នកដឹងទេ គ្រប់ពេលដែលខ្ញុំពិបាកចិត្ត ខ្ញុំតែងតែឡើងលើដំបូលផ្ទះ ដើម្បីបណ្ដែតអារម្មណ៍ឱ្យវាហោះហើរទៅកាន់ពិភពដែលខ្ញុំចង់ទៅ។ តែខ្ញុំក៏គិតផងដែរថា ការធ្វើនេះវាគ្រាន់តែកុហកខ្លួនឯងតែប៉ុណ្ណោះ។
ចុងបញ្ចប់ ខ្ញុំសូមជូនពរមិត្តឱ្យនិពន្ធរឿងឱ្យបានកាន់តែច្រើនហើយខ្ញុំសូមជូនពរឱ្យមិត្តជួបតែសំណាងល្អ សុខភាពល្អ កម្លាំងមាំមួន។
ពីខ្ញុំ ពុទ្ធី មិត្តរួមថ្នាក់ជាមួយអ្នក!
ប៉ុន្មានថ្ងៃមុន បងពុទ្ធីសួរខ្ញុំថា “Message លាក់ស្នេហ៍ហ្នឹង យើងនិពន្ធឬមិនមែន?” គាត់ប្រាប់ថាគាត់ចូលចិត្តរឿងនេះ ហើយពិសេសនោះគឺរឿង “បេះដូងរាបស្មើ” របស់បងចាន់ផល។ ស្រាប់តែព្រឹកនេះ គាត់បានឱ្យសំបុត្រនេះមកខ្ញុំដោយប្រាប់ថា “ទៅដល់ផ្ទះចាំបើកមើល!” ខ្ញុំទទួលដោយមិនរួញរាព្រោះគាត់ជាស្រី មិនចាំបាច់ខ្លាច “សំបុត្រលាក់ស្នេហ៍” អីទេ! បើគិតៗទៅ មនុស្សយើងមើលត្រឹមរូបរាងខាងក្រៅមិនបានទេ។ បងពុទ្ធីលេងច្រើន តែនៅតែមានពេលមិនសប្បាយចិត្ត! ជីវិតគឺអ៊ីចឹងណ៎?
កំណត់ហេតុស្នេហ៍ចេញលក់ ខែ មករា 6, 2009
Posted by khmeryouthwriters in ដំណឹងផ្សេងៗ.15 comments
សូមអភ័យទោសដល់ប្រិយមិត្រផង ព្រោះខានអាប់ដេតអស់ពេលរយៈពេលយ៉ាងយូរដែរហើយ ។ ឆ្នាំថ្មីចូលមកហើយ happy new year!
ជូនដំណឹងមួយថា សៀវភៅ “ កំណត់ហេតុស្នេហ៍” ឥឡូវបានចេញលក់លើទីផ្សារហើយ ។ សៀវភៅនេះបោះពុម្ព និងបានចេញលក់តាំងពីមុនថ្ងៃបុណ្យណូអែលម៉្លេះ ។ សៀវភៅទី២នេះ បោះច្រើនជាងសៀវភៅមុនដល់ទៅ ៤ដង ឃើញថាចំនួនច្រើនជាងមុន ។
សម្រាប់ប្រិយមិត្រតាមអ៊ិនធើណិត ពុំទាន់បានអានរឿងទីនេះបានទេ ព្រោះក្រុមការងារពុំមានពេលគ្រប់គ្រាន់ដឹងដាក់រឿងសោះម៉ង ច្នេះទេសូមមេត្តារង់ចាំមួយរយៈសិន ។
អរគុណ
